Lehenengo hitzaldi saioan ikerketa eta sematikari buruzko bi hitzaldi izan zituen. Alde batetik AnHitz proiektuaren aurkezpena Igor Leturia Elhuyar Fundazioko kidearen eskutik eta beste batetik bi aurkezpen Markatzaile sozialen hobekuntza posibleen inguruan Arkaitz Zubiaga (UNED) eta Egoitz Gonzalezen (EHU) eskutik.

Igor Leturiak AnHitz proiektuaren xehetasunak aurkeztu zizkigun demo eta guzti. AnHitz proiektua Eusko Jaurlaritzaren ETORTEK programaren bitartez finantzatutako proiektu estrategikoa da. Elhuyarez aparte, EHUko IXA taldea, Robotiker, EHUko Aholab taldea, eta VICOMTech zentro teknologikoa batu ditu proiektuak. Helburua pertsonak eta gailuak elkarreraginean aritzeko behar diren euskarazko hizkuntza-teknologiak ikertzea eta garatzea, eta ezagutzak modu naturalean, intuitiboan eta atseginean kudeatzea da. Proiektuko emaitzak garatzeko hizkuntz teknologi desberdinak erabili dituzte, hala nola, zuzentzaileak, informazioaren berreskurapena, informazio-erauzketa, dokumentuen sailkapena, ahotsaren ezagutza, ontologia lexikoak, testu-corpusak, etab. Proiektuko emaitzen artean euskaraz hitz egiten duen 3Dko zientzia-aditu birtual bat erakutsi zigun Igorrek, Irratia.comen 135. saioan entzun daiteke funtzionamendua.

Bestalde, semantikarekin jarraituz baina markatzaile sozialen inguruan, Egoitz Gonzalezek Bildu.net markatzaile sozialaren hobekuntza batzuk aurkeztu zituen. Bildu.net metadatu gutxi gordetzen zituela eta hiru hobekuntza nabarmen proposatu zituen Egoitzek:Dublin Core, RDFa eta mikroformatuen bidez metadatu gehiago gordetzeko aukera, datuen betetze automatikoa eta zein etiketa erabili eta mota definitzeko gomendioak. Aldaketa hauek Bildu.neteko erabiltzaileek nabari ditzazkete jada bertsio berrian aurreko sinpletasuna mantenduz, izan ere, interfaze berdina izaten jarraitzen du.

Arkaitz Zubiagak, etiketa-lainoen ikuskera hobetzeko multzokatze metodo bat aurkeztu zuen. Azpimarratzekoa da Arkaitzek aurkeztutako idatzizko artikulua, erdarazko izen handiko konferentzi askoren parekoa. Lanaren helburua markatzaile sozialen etiketa-lainoen antolaketa ezaren aurrean, etiketen arteko zerikusiaren araberako multzokatzea gauzatzea da, ikuskera eta bilaketa erraztuz eta lotuta dauden etiketetara harpidetzea eskainiz. Proiektuaren xehetasunak egindako aurkezpenean eta UNEDeko “Natural Language Processing” taldeko Web orrian aurkitu daitezke. Aurreko proiektuko emaitzak ez bezala, metodo barri honen emaitzak ezin dira oraindik Delicious eta Bildu.net bezalako markatzaile sozialetan ikusi. Espero dugu etorkizunean aurrerapen interesgarri hauek hainbeste erabiltzen dugun Web tresnetan ezarrita ikustea.

Bigarren hitzaldi saioan IP telefonia eta geografia eta mapen buruzko hitzaldia izan genituen. Lehenengoan Ironteceko Jon Bonillak IP telefonia abantailak eta software librearen inguruko hainbait gai aipatu zizkigun. Bestalde Tagzania Serviceseko Luistxo Fernandezek gogoeta interesgarriak utzi zizkigun datu irekiei buruz, eguraldi mapetatik hasi eta OpenStreeMap ekimenarekin bukatuz. Zergatik ez dira Euskalmeteko datuak libreki eta formatu estandar batean eskaintzen bererabili ahal izateko? Googlek hala egin zun Google Mapsekin erabiltzaileei euren datuekin aplikazio berriak sortzen erraztuz eta hara hor emaitza. Luistxoren hitzetan “Erakunde publikoek informazio publikoarekin sorkuntza eta ekintzailetza komunitarioa (eta baita enpresariala) sustatu beharrean, kontrakoa egin dute” eta “Enpresa pribatu batek informazio pribatua doan emanez sorkuntza eta ekintzailetza komunitarioa sustatu du. Bide batez, aberasten ari dira”. Bestalde, kontu euki behar da Google eta Google Map Maker (herritarrek mapak sortzeko aplikazioa) bezalako ekintzekin , izan ere datuak ez dira libreak, Googleren esku daude eta badaude lizentzia eta datu libreetan oinarritutako alternatibak OpenStreetMap bezalakoak.

Atsedenaldian Ander Goñi lagunarekin hitzegin ahal izan nuen lanari buruzko hainbat konturi buruz. Bere blogean ere ekitaldiaren laburpen on bat aurkitu dezakezue. Atsedenaldia eta gero, goizeko hirugarren saioan hainbat esperientzia ta proiektu aurkeztu ziren, tartean Codesyntaxeko Josu Azpillagak aurkeztutako Morfeo-EzWeb proiektu interesgarria Interneteko sarrera-orri pertsonalizatuen inguruan (ad.: iGoogle). Anderren blogean honi buruzko eta beste saioei buruzko laburpena aurkitu dezakezue.